9. Имам Шафиғидың тамаққа қатысты насихаттары
Имам Шафиғи: Тамақты төрт түрге бөліп жеуге болады:
1. Жалғыз саусақпен жеу. Бұл – кірпияздық.
2. Екі саусақпен жеу. Бұл – тәкаппарлық.
3. Үш саусақпен жеу. Бұл – сүннет.
4. Төрт не бес саусақпен жеу. Бұл – құлқынның құлы болу.
Төрт нәрсе тәнге қуат береді:
1. Ет жеу;
2. Хош иіс;
3. Жыныстық қатынасқа түспей тұрып жуыну;
4. Кетен киім кию.
Төрт нәрсе тәнді әлсіретеді:
1. Жыныстық қатынасты көп жасау,
2. Көп уайымдау;
3. Ашқарынға көп су ішу;
4. Ащыны көп жеу.
Төрт нәрсе көздің көру қабілетін күшейтеді:
1. Құбылаға қарап отыру;
2. Ұйқының алдында көзге сүрме жағу;
3. Жасылға қарау;
4. Киімді таза ұстау.
Төрт нәрсе көздің көру қабілетін әлсіретеді:
1. Жаман нәрсеге көп қарау.
2. Өлім жазасына кесілген адамға ұзақ қарау.
3. Әйелдің әурет жеріне қарау.
4. Құбылаға арқаны беріп отыру.
Төрт нәрсе жыныстық қатынасқа деген белсенділікті арттырады:
1. Шымшық еті;
2. Итрифили әкбәр (бірнеше элементтен тұратын дәрі);
3. Пісте;
4. Ақжелкен.
Ұйықтаудың төрт түрі бар:
1. Шалқайып жатып ұйықтау. Бұлай жату – пайғамбарлардың жатысы. Олар аспанға қарап жатып, оның жаратылысына ой жүгірткен.
2. Оң жақпен жатып ұйықтау. Бұл – ғалымдар мен тақуалы құлдардың жатысы.
3. Сол жақпен жатып ұйықтау. Бұл – патшалардың жатысы. Олар жеген тағамын сіңіру үшін солай жатқан.
4. Етпеттеп жатып ұйықтау. Бұл – шайтандардың жатысы.
Төрт нәрсе ақылды арттырады:
1. Артық және орынсыз сөйлемеу;
2. Мисуәк қолдану;
3. Ізгілермен бірге болу;
4. Ғалымдармен бірге жүру.
Төрт нәрсе құлшылық болып саналады:
1. Әрдайым дәретпен жүру;
2. Көп сәжде жасау;
3. Мешітте көп болу;
4. Құранды көп оқу.
Имам Шафиғи тағы: «Ашқарын моншаға кіріп шыққан соң тамақтанбаған адамның қалай өмір сүріп жүргеніне, қан алдыра салып тамақ ішкен адамның қалай өлмегеніне таң қаламын», – деген.
Сондай-ақ тағы бір сөзінде ол кісі: «Оба ауруына ең жақсы дәрі – шегіргүл», – деген. Дұрысын Алла біледі.
Kirish yoki roʻyxatdan oʻtish sharh qoldirish uchun