Сонымен бала кезден бір кәсіпті армандап, арманыңа қол созып, жан аямай еңбек қылып, алған бетіңнен қайтпай жүріп отырсаң, сөйте тұра ол белесті бағындыра алмасаң не болады? Ештеңе де болмайды. Онда мәнді басқа жақтан іздейсің. Керек десең, мұндағы негізгі құндылық мақсаттың өзі емес, соған бара жатқан жол еді. Көздегенің мақсаттың өзі ғана болса, оған жете алмасаң да, жетсең де тығырыққа тірелесің. Жете алмасаң, өзіңді жете алмағаның үшін мүжисің. Жетсең, одан арғы жолыңды таба алмай тығырыққа тірелесің. Сондықтан адамның мәнді бір ғана мақсатқа байлап алмауы маңызды. Логотерапия ғылымының «мән пирамидалық емес, параллельді негізде болуы керек» дейтіні осыдан.