Яна бир жосус эса Саратов томондаги қишлоқлик оддийгина эркак эди. У Волгабўйи немисларидан озиқ-овқат сотиб олар ва уларни Москвага элтиб, бозорда сотиш билан шуғулланарди. Ва албатта, у ўз-ўзидан “немис разведкаси ёллаган ходим” бўлмаслиги мумкин эмасди! Немислар унга қандай топшириқ берганини у ўзи ўйлаб тополмасди, унинг учун энди терговчи ўйлай бошлаганди.