Сегізіншісі, адамдардың бір тобы байлығына, саудасына, бір тобы өзінің күшіне сүйенетіндігін көрдім. Мен Алла тағаланың «Кім Аллаға арқа сүйеп, тәуекел етсе, оған (қолдаушы һәм медеткер ретінде) бір Алла жеткілікті» (Талақ, 3) деген аятына ой жүгіртіп, тек Аллаға ғана тәуекел еттім, оған толық бағындым. Ол маған жетеді. Міне, сізден осы нәрселерді үйрендім, – дейді. Сонда Шақиқ:
– Хатим! Алла саған мейірімін төксін! Шындығында, мен Таурат, Інжіл, Забур және Құран Кәрімді зерттеп шықтым. Ақырында, діни істер мен ізгі амалдардың осы сегіз мәселеге негізделгенін көрдім. Осы сегіз негізді басшылыққа алған адам төрт кітаптың үкімімен амал еткен болады, – дейді.