Дүние әлі-ақ өтер қимағанмен,
Сыйласқын өз басыңды сыйлағанмен
ТІЛЕУБЕРДІГЕ
Желбуаз жігіт екен жыр таңдаған,
Бұл заманның болысы күй таңдаған.
Көп ішінде көлбеңдеп көрінем деп,
Көрінгенге соқтығып, тыртаңдаған.
БАЙ БОЛСАҢ
Бай болсаң қадірліксің ағайынға,
Жоқ болсаң жолатпайды маңайына.
Жігіттер, терің төгіп, мал жинағын,
Мал опа тіршілікте талайыңа.
Малды қара, жігіттер, малды қара!
Одан басқа біздерде жоқ қой шара.
Қыс түскенде ішерге ас таппасаң,
Боласың сонда, азамат, қас масқара!
БАСҚА МҮЙІЗ ШЫҚТЫ МА?
Тілмен ою ойғанмын,
Мақтаншақтың үстінен
Жыртпай тонын сойғанмын.
Би мен болыс, байлардың,
Қожалар мен молданың
Сыбағалы мүшесін
Алдына тартып қойғанмын.
Басқа мүйіз шықты ма,
Талай базар базарлап,
Алуан тойды тойладым.
Жарға біткен жантақты,
Жаннан кешкен нар жейді.
Қиындықты қиналмай,
Кешкен ерді нар дейді.
Ақылы жоқ ер жігіт
Ағайынды жат қылар.
Ақылы бар ер жігіт
Жатты сыйлап дос қылар.
ҚАЖЫЛАРҒА
Ысқақ, Ыспан кешегі —
Мекке барған қажылар.
Кітабына жазмыштың,
Бәрі - дағы жазылар.
Меккеге жүрер кезінде
Он сапар тілеп, бата алдың
Қожа болып келген соң,
Барымталап мал жиып,
Ұры қажы атандың.
Ағарыпты бұл күнде,
Ұрлықпенен сақалың.
БАҚСЫҒА
Ей, Елеміс, Елеміс,
Киініпсің әлеміш.
Бақсылықты қойсаңшы,
Сенсіз де болар бір мәніс.
Қолың толған салдырмақ,
Сылдырмақ не тындырмақ.
Сиқырлы адам болғансып,
Айтасың аят былдырлап.
СҮЙІНБАЙДЫҢ ТӨРЕЛIГІ
Бірде Албан, Дулат тайпалары Асы жайлауына таласып қалады. Албандар Дулатқа «Асыдан жайлау бермейміз» деп қарсы шығады. Көш тоналады. Ел барымталанып қалады. Дулаттың батыры Сыпатай жасақ жияды. Осы кезде Албан елінің төресі Тезек орыстың ұлығына сүйеніп, жиырма шақты әскер алып шығып, Сыпатайды ұстатады.
