Цитаты из книги автора Жорж Оруэлл Молхона

У кун келар, келади албат,

энг буюк покликнинг пок мавжудоти,

одам деганлари тугайди абад,

қолади дунёда ҳайвонлар зоти.

Турли маълумотномаларни ўқиб берар экан, Қичқироқ титраган овози билан исботлаб берардики, энди уларда, Жонс замонасиникига қараганда, дон ҳам кўп, пичан ҳам кўп, лавлаги ҳам кўп, улар кам ишламоқдалар, узоқ яшамоқдалар, ичимлик сувининг сифати ошган, болалар ўлими кескин камайган ва энди катакларда пичан аввалгидан кўра кўп ва уларни пашша ва сўналар олдинги даражада безовта қилмаяпти. Ҳайвонлар унинг ҳар бир сўзига ишонардилар. Очиғини айтганда, Жонс ҳам, унга боғлиқ тафсилотлар ҳам жониворларнинг хотирасидан деярли ўчиб кетаёзганди. Улар билардиларки, оғир ҳаёт кечирмоқдалар, тез-тез очлик ва совуқ исканжасида қолмоқдалар, уйқудан бошқа қолган барча вақтларда меҳнат қилмоқдалар. Бироқ, ҳеч бир шубҳасиз, аввал бундан ҳам ёмон эди. Улар бунга шаксиз ишонар эдилар. Бунинг устига, улар аввал қуллар эдилар, энди эса озод ва мустақилдирлар, масаланинг моҳияти айнан шундайлигини маънавиятчи чўчқа Қичқироқ тинмай таъкидларди.

Кузга келиб жониворлар хушбахт бир чарчоқни ҳис қилдилар. Улар ўз елкаларида оғир йилни олиб чиқдилар, доннинг бир қисми сотилганидан кейин, заҳиралар қишловга етмаслиги мумкин, аммо қад тиклай бошлаган тегирмон уларга таскин берарди. Унинг қурилиши деярли ярмига етиб қолганди. Йиғим-теримдан сўнг очиқ ва қуруқ ҳаво ўрнашди, жониворлар одатдагидан қийинроқ шароитда ишладилар. – Айни пайтда, оғир ҳарсангларни ташир экан, улар ўзларини омадли ҳисоблар эдилар, чунки деворни яна бир футга кўтарадилар, ахир. Терим мавсумида Боксёр қурилишга ҳатто тунлари ҳам келар ва ой ёруғида бир-икки соат ишларди. Дам олиш лаҳзаларида жониворлар тегирмон қурилиши атрофида сайр қилар, текис деворларнинг салобатига қараб, бу муҳташам бинони ўзлари тиклаганликларидан фахрланардилар. Фақат кекса Бенжамин тегирмондан мағрур бўлмас, лекин у ҳам айтгани гап топмаганидан, эшаклар узоқ яшайдилар, бу тегирмондан кўра узоқ, деганга ўхшаган қочиримлардан нари ўтмасди.