КІРІСПЕ

Айнамен жұмыс істеуді үйрететін 21 күндік курсыма қош келдіңіз, қымбаттым. Бұл курс менің «LovingYourself» деп аталатын танымал видеокурсыма негізделген. Алдағы үш апта бойы жай ғана айнаға қарап отырып, өміріңізді қалай өзгертуге болатынын үйренесіз. Айнамен жұмыс — көзіңізге ұзақ қарап, аффирмацияларды қайталау арқылы өзіңді жақсы көруді және әлемді қауіпсіз, махаббатқа толы мекен ретінде көре бастауды үйрететін ең тиімді әдіс. Адамдарды аффирмация айтуға баули бастаған сәттен бері айнамен жұмыс істеуді қоса үйретіп келемін. Қарапайым тілмен айтқанда, біз айтқан немесе ойлаған нәрсенің бәрі — аффирмация. Сіздің өз-өзіңізбен сөйлесуіңіз, миыңыздағы бітпейтін диалог, мұның бәрі — кәдімгі аффирмация ағыны. Бұл аффирмациялар ойлау мен мінез-құлықтың үйреншікті тәсілдерін белгілейтін бейсанаңызға жолданған хабар саналады.

Позитивті аффирмациялар өзіңе деген сенім

қалыптастырып, өзіңді бағалауға және жан тыныш-

тығы мен ішкі қуанышқа жетуге көмектесетін шипалы ойлар мен идеяларды санаға сіңіреді. Ең күшті аффирмациялар — айнаның алдында дауыстап айтылатын аффирмациялар. Айна сіздің өзіңізге деген қарым-қатынасыңызды, сезімдеріңізді көрсетеді. Ол сізге қай жерде өз-өзіңізге қарсылық көрсетіп жатқаныңызды, ал қай мәселеде ашық және жатық екеніңізді бірден білуге мүмкіндік береді. Бақытты, толыққанды өмір сүргіңіз келсе, қандай ойларды өзгерту керек екенін анық көрсетеді.

Айнамен жұмыс істеуді үйрене отырып, айтқан сөзіңіз бен жасаған ісіңіз жайында көбірек хабардар боласыз. Өзіңізге бұрынғыдан да жақсы күтім жасап, қамқор болуды үйренесіз. Өміріңізге бір жақсылық келгенде айнаға барып «Разымын, мың алғыс. Бұл бір керемет! Осыны жасағаның үшін рахмет» десеңіз болады. Егер жаман бірдеңеге ұшырасаңыз, тағы да айнаға барып: «Мейлі, мен сені бәрібір жақсы көрем. Жаңа ғана болған нәрсе өтеді де кетеді, ал мен сені өмір бойы жақсы көріп өтемін» деп назыңызды айта аласыз.

Алғашқы кезде көбімізге айна алдына отырып, өз-өзімізге қараудың өзі оңайға соқпасы анық, сол үшін біз бұл процесті айнамен жұмыс деп атаймыз. Бірақ жалғастыра келе өзіңе мін тағу азайып, бұл жұмыс қызық ойынға айналады. Көп ұзамай айна дұшпан емес, серігің, жақын досың болып кетеді. Айнамен жұмыс — өзіңізге жасай алатын ең керемет сыйдың бірі. «Сәлем, сүйкімдім», «Күшті боп тұрмын» немесе «Қызық қой, иә?» деп айту үшін бар болғаны бір секунд уақыт қажет. Күні бойы өзіңізге аз-аздан болса да жағымды хабарлар жолдап отыру өте маңызды.

Өзіңізді мақтау, қолпаштау және қиын кезеңде қолдау көрсету үшін айнаны неғұрлым көп пайдалансаңыз, өзіңізбен қарым-қатынасыңыз соғұрлым терең және жайлы болады. Бәлкім, бұл бағдарлама неге 21 күнге арналған деп ойлайтын шығарсыз. «Үш аптада өміріңді толығымен өзгерту мүмкін бе?» деген сұрақ туындауы да заңдылық. Иә, толығымен өзгерту мүмкін емес шығар, бірақ өзгеріс дәнін еге аласыз. Айнамен жұмысты жалғастыра берсеңіз, бұл дән қуанышқа толы бақытты өмірдің есігін ашатын жаңа, салауатты әдеттерге айналады. Ендеше, бастайық.

Бірінші күн

ӨЗІҢДІ ЖАҚСЫ КӨРУ

Өзіңді жақсы көру өте маңызды. Айнамен жұмыс өміріңіздегі ең қажетті қарым-қатынасты құруға көмектеседі, бұл — өзіңізбен арадағы байланыс.

Айнамен жұмыс істеп бастағанда «оп-оңай ғой, оның несін үйренемін» деп немесе мұны тіпті ақымақтық деп ойлауыңыз мүмкін. Мен сізге алдағы 21 күнде істеп көр деп ұсынған нәрселердің көбі бастапқыда ешқандай өзгеріс әкелмейтіндей тым қарабайыр болып көрінуі де ғажап емес. Бірақ мен ең маңызды дүниелер сол қарапайым әрекеттерден басталатынын білемін. Ойыңыздағы бір кішкентай құбылу өміріңізге үлкен өзгеріс әкелетіні анық. Біз күн сайын әртүрлі тақырыпты қозғаймыз. Мен сол тақырып аясында өз ойларыммен бөлісемін, содан кейін сізге «Айнамен жұмыс істеу» жаттығуын беремін. Ал сіз өз кезегіңізде сол жаттығуды күні бойы қайталауыңыз керек. Жаттығуды таңертең жуынатын бөлмедегі айна алдында бастасаңыз болады, содан кейін күні бойы айнаның жанынан өткен сайын немесе әйнектен сұлбаңыз көрінгенде қайталай беріңіз.

Сондай-ақ қалтаңызға қолайна салып жүріңіз. Арасында бір сәт уақыт табыла қалса, айнамен жұмыс істей аласыз. Жалпы айнамен жұмыс істеп бастағанда күнделік жүргізген жөн. Ойларыңыз бен сезімдеріңізді жазып отырыңыз, сонда өзіңіздің қаншалықты ілгерілеп, өзгеріп жатқаныңызды көре аласыз. Мен сізге күн сайын жазбаша жаттығулар беремін, онда ойларыңызды жазып бастауға көмектесетін бірнеше сұрақ болады.

Мен әрқайсымыздың ішімізде бір құдіреттің барына сенемін, ол бізді сүйетін және қолдайтын, бар салада гүлдену әкелетін Әмбебап Күшпен тығыз байланысты. Күнделік жүргізу сізге осы күшпен байланыс орнатуға көмектеседі. Сіз өсуге және өзгеруге қажет бүкіл нәрсе өз бойыңызда бар екеніне көз жеткізесіз. Күн сайын айнамен жұмысыңызды қолдау үшін «Жүрек ойын» және сол күннің тақырыбын сіңіруге көмектесетін аффирмациялар ұсынып отырамын. Күнді жетекші медитациямен аяқтаймыз. Ұйықтар алдында тыныш жерде отырып, осы идеялар өміріңізді қалай жеңілдететінін және қаншалықты жақсартатынын ойлап көріңіз. Кітаптағы медитацияны оқысаңыз болады немесе бейімделген аудионұсқасын тыңдай аласыз.

Бірінші күнге арналған айна жаттығуы

1. Жуынатын бөлмедегі айнаның қарсы алдына тұрыңыз не отырыңыз.

2. Көзіңізге қараңыз.

3. Терең дем алып, мына аффирмацияны айтыңыз: Мен сені жақсы көргім келеді. Сені шын жақсы көріп үйренгім келеді. Осы мақсатымызға бірге жетейік және шынымен көңіл көтерейік.

4. Тағы бір терең тыныс алып, былай деңіз: Мен сені жақсы көруді үйреніп жатырмын. Мен сені шын сүюді үйреніп бастадым.

5. Бұл — бірінші жаттығу. Түсінем, аздап қиын болуы мүмкін, бірақ ортасынан үзіп, тастап кетпеңіз. Терең тыныс алуды жалғастырыңыз. Көзіңізге қараңыз. Өз есіміңізді бөтен адам атағандай атап, былай деңіз: Мен сені жақсы көріп үйренуге дайынмын (атыңызды атаңыз). Мен сені сүюді үйренгім келеді.

6. Күні бойы айнаның жанынан өткен сайын немесе одан өз бейнеңізді байқап қалғанда осы аффирмацияларды қайталаңыз. Тіпті жүзіңізге тіке қарап осылай деу соншалықты ауыр болса да, өтінем, айта беріңіз.

Басында аффирмацияларды қайталау кезінде өзіңізді ақымақ немесе пайдасыз бірдеңемен айналысып жатқандай сезінуіңіз мүмкін. Тіпті ашуланып, көзіңізге жас келуі де ғажап емес. Бәрі дұрыс, шын мәнінде, бұл — қалыпты жағдай. Бірақ сіз жалғыз емессіз. Мен сізбен біргемін, ұмытпаңыз. Мен де осының бәрінен өттім. Ал ертең жаңа күн басталады.

Ғаламат күш ішіңізде: Бірінші күнге арналған күнделік сұрақтары

1. Таңертең айнамен жұмысты аяқтағаннан кейін не сезіндіңіз және бойыңыздан не байқадыңыз — соның бәрін жазыңыз. Ашуландыңыз ба, реніш пайда болды ма, әлде өзіңізді ақымақ сезіндіңіз бе?

2. Таңертең айна жұмысын аяқтағаннан кейін арада алты сағат өткенде сезімдеріңіз бен не байқағаныңызды қайта жазыңыз. Айнамен жұмысты немқұрайды жалғастыра отырып, өзіңізге айтқан сөздерге сене бастадыңыз ба?

3. Күні бойы мінез-құлқыңыздағы кез келген өзгерісті бақылаңыз. Сеніміңізге селкеу түсті ме, әлде беки түсті ме? Жаттығу жеңілдеді ме, әлде арада біраз уақыт өтсе де әлі қиын болып көріне ме?

4. Түнде ұйықтар алдында бүгінгі айнамен жұмыстан не үйрендіңіз, қандай қорытынды шығардыңыз — сол жайында жазуды ұмытпаңыз.

Бірінші күнгі жүректегі ойлар: Мен ашықпын және өмір сыйын қуана қабылдаймын

Иә, біз өмірімізді жақсы жаққа өзгерту үшін айнамен жұмыс істейміз, бірақ ішімізде соған лайық екенімізге сенбейтін бір кішкентай күмән болса, айнаға қарап айтқан сөздерімізге өзге түгілі, өзіміз сенбейміз. Сосын түбі айнамен жұмыс істегеннен ешқандай пайда жоқ деген ойға келіп тірелеміз.

Шындығында, «айнамен жұмыс істегеннен түк шықпайды» деген тұжырымның айна жұмысының өзіне немесе біз айтатын аффирмацияларға еш қатысы жоқ. Мәселе мынада — біз өмір сыйлаған бүкіл игілік пен жақсылыққа өзіміздің лайық екенімізге сенбейміз.

Егер сіз де солай ойлайтын болсаңыз, мына аффирмация ойыңызда жүрсін: Мен ашықпын және өмір сыйын қуана қабылдаймын.

Бірінші күннің медитациясы: Өзіңді сүю (бірінші күннің аудиосы)

Әрқайсымыз өзімізді бұрынғыдан қаттырақ жақсы көре аламыз. Әрқайсымыз махаббатқа лайықпыз. Біз жақсы өмір сүруге, деніміз сау тіршілік кешіп, біреуді сүйіп, біреудің сүйіктісі болып, өсіп-өнуге лайықпыз. Әрқайсымыздың ішіміздегі кішкентай сәби керемет тұлға болып ержетуге лайық. Сондықтан өзіңізді жан-жақтан махаббатпен қоршап алғаныңызға көз жеткізіңіз. Өзіңізді бақытты, дені сау және біртұтас тұлға ретінде көріңіз. Бүкіл егжей-тегжейін қамти отырып, өзіңіз қалаған өмірді көз алдыңыздан өткізіңіз. Соған лайық екеніңіз есіңізде болсын. Содан кейін жүрегіңіздегі сүйіспеншіліктің тұла бойыңызға таралып, махаббатпен толтырғанын сезініңіз және оны өз еркіне босатып жіберіңіз. Екі жағыңызда сіз жақсы көретін адамдар отыр деп елестетіңіз. Сол жағыңыздағыларға өзіңіздегі махаббатты және оларға жұбаныш беретін ойларды жолдаңыз. Оларға мейірім мен демеу беріп, жақсылық тілеңіз. Жүрегіңізден шыққан махаббатты оң жағыңыздағы адамдарға қарай бағыттаңыз. Оларға дәтке қуат болатын күш, сүйіспеншілік, тыныштық пен жылулық сыйлаңыз. Сіз үлкен махаббат шеңберінде отырғанда сіздің ыстық мейіріміңіз бөлмені айналып ұшып жүрсін. Сіз берген махаббат өзіңізге қайта оралған кезде еселеп көбейетінін сезініңіз. Махаббат — ең күшті дауа, барлығынан емдейтін күш. Сіз ішіңіздегі бұл махаббатты әлемге шығарып, оны кез келген адаммен үнсіз бөлісе аласыз. Өзіңізді сүйіңіз. Бір-біріңізді сүйіңіздер. Ғаламшарды сүйіңіз және бәріміздің бір екенімізді ұмытпаңыз.

Екінші күн

АЙНАМЕН ДОС БОЛУ

Бүгін сіз ескі сенім-түсініктерге мән берместен өзіңізге мұқият қарауды үйрене отырып, айнамен жұмыстың негізгі жаттығуларын жасай бастайсыз.

Бұл — айнамен жұмыстың екінші күні және сіз өзіңізді жақсы көруді, құрметтеуді енді ғана үйрене бастадыңыз. Ендеше, орныңыздан тұрыңыз. Өмір және өзіңіз жайлы ойлаудың жаңа әдісін күнбе-күн қолданған сайын ұзақ уақыт санаңызда қалыптасып қалған ескі жағымсыз түсініктер біртіндеп ығыса бастайды. Жақын арада сіз көбірек жымиятын боласыз, сонда айнаға қарау да жеңілірек болады. Көп ұзамай аффирмациялар шындыққа айнала бастайды. Енді қолайнаңызды шығарыңыз немесе жуынатын бөлмедегі айнаның алдына барыңыз. Денеңізді бос ұстап, терең тыныс алыңыз. Айнадағы өз бейнеңізге көз салыңыз. Содан кейін атыңызды атап тұрып, былай деңіз: [Атыңызды атаңыз], мен сені жақсы көремін. Мен сені шын жақсы көремін.

Мұны тағы екі мәрте қайталайық: Мен сені жақсы көрем. Шынымен де қатты жақсы көрем. Мен сені ЖАҚСЫ КӨРЕМ. Мен сені шынымен де қатты-қатты ЖАҚСЫ КӨРЕМ. Қалай екен? Осыдан кейін не сезіндіңіз? Шыныңызды айта беріңіз, иә, бұл бір қарағанда біртүрлі есалаңдық секілді көрінеді. Өйткені бастапқыда расымен солай сезіледі. Немесе сіз мұны айтуға кәдімгідей қиналуыңыз мүмкін. Мұндай сезімдердің болуы — қалыпты жағдай. Себебі өзіңді сөзсіз сүю — сіз бұрын ешқашан жасамаған нәрсе. Өзіңізге осы сезімдерді сезінуге мүмкіндік беріңіз.

Не сезінсеңіз де, бұл — бастамасы ғана, жаңа нәрсеге бас-көзіңмен қойып кететін нағыз қолайлы сәт. Өзіңізге «мен сені жақсы көрем» деп айту қаншалықты қиын екенін білемін. Бірақ сонымен қатар бұл нәрсе қолыңыздан келетінін де білемін және тырысқаныңыз үшін сізге дән ризамын. Бірте-бірте айнамен жұмыс істеу жеңілдей түседі, сөзіме сеніңіз. Егер сізге «Мен сені жақсы көрем» деп айту өте қиын болса, қарапайым нәрседен бастай аласыз. Мәселен, мына сөздерді айтуға болады: Мен сені жақсы көріп үйренгім келеді. Мен сені сүюді үйреніп жатырмын.

Айнадағы келбетіңізге қарағанда балабақшадағы баламен сөйлесіп тұрғандай әрекет етсеңіз деймін. Өзіңізді осы балабақшаның жас тәрбиешісі деп елестетіп көріңіз. Енді атыңызды атап, сол ішкі балаға үн қатыңыз: [Атыңызды атаңыз], мен сені жақсы көрем. Мен сені шынымен де жақсы көрем.

Айнамен неғұрлым көп жұмыс істесеңіз, соғұрлым оңай болады. Бірақ бұған біраз уақыт қажет екенін ұмытпаңыз. Сондықтан қолыңыз қалт етсе, айнамен жұмыс істеуді әдетке айналдырыңыз. Мұны таңертең тұра салып, басқа шаруаларыңызға кіріспес бұрын жасаңыз. Қайда барсаңыз да, қолайнаңызды тастамай алып жүріңіз, сонда өзіңізге деген сүйіспеншілікке толы сөздерді кез келген жерде айта аласыз. Қане, бастайық: Мен әдемімін. Мен күштімін. Мені жақсы көру оп-оңай.

Екінші күнге арналған айна жаттығуы

1. Жуынатын бөлмедегі айнаның алдына барыңыз.

2. Көзіңізге қараңыз.

3. Атыңызды атап тұрып, былай деңіз: [Атыңызды атаңыз], мен сені жақсы көрем. Мен сені шынымен де қатты жақсы көрем.

4. Мұны тағы екі-үш мәрте қайталап көріңіз: Мен сені шынымен де қатты жақсы көрем, [есіміңіз].

5. Осы сөздерді қайта-қайта айта беріңіз. Мұны күніне кемінде 100 мәрте қайталай алатыныңызға сөз беремін. Иә, дәл солай — күніне 100 рет. Білем, тым көп сияқты көрінеді, бірақ шынымды айтайын, курстан өткеннен кейін күніне 100 рет деген түк қиын болмай қалады.

6. Сонымен, айнаның жанынан өткен сайын немесе әйнектен бейнеңізді көре сала мына аффирмацияны қайталаңыз: [Атыңызды атаңыз], мен сені жақсы көрем. Мен сені шынымен жақсы көремін.

Өз-өзіңе «мен сені жақсы көрем» деп айту неге қиын дегенде оның бір себебі — адамның өзін ескі жағымсыз түсініктер арқылы бағалайтынында болуы мүмкін. Әртүрлі ойларың үшін өз-өзіңді айыптап, ыңғайсыздықты одан сайын күшейтпеңіз. Бойыңызды еркін ұстаңыз және аффирмация айтуға міндеттеме алыңыз. Есіңізде болсын, сіз шындыққа сай келетін аффирмациямен келісесіз. Шынын айтқанда, біз өзімізді сынап-мінеп, кінә тақпаған кезде өз-өзімізді шынымен жақсы көреміз. Айнамен жұмыс істегенде қолыңызда сулық болғаны дұрыс, өйткені бұл жұмыс есте қалатындай әсерлі, мұңды болуы мүмкін. Көп жағдайда ол тереңде жатқан эмоцияларды сыртқа шығарады. Мәселе мынада, біз кейде өзімізге келгенде өте қатал, мейірімсізбіз. Сондықтан өзімізді жақсы көруді үйр